Revelation of John 5
1O i kilaner nan lim pali maun, en me kotidi pon mol o, puk eu, intinidier lole o liki o kateneki pena men katen isu. 2O i kilan tounlan kelail amen, pepeidokki nil laud: Is me kon on pak pasan puk o, o lapwada a men katen kan? 3A sota amen, me mi nanlan de nin sappa, de pan sappa, me kak on pak pasan puk, o udial i. 4Ari, i ap sanesan kaualap, aki sota amen, me diarokadar, me kon on, en pak pasan puk o, de udial i. 5O amen ren me lapalap akan masani on ia: Koe der sanesan! Kilan, Laien, me udan kainok en Iuda, tapin Dawid, me pwaidar ni a peipei, pwen kon on, pak pasan puk o, o lapwa san men katen isu. 6O i kilan nan waron en mol o nan pun en man pamen o nan pun en lapalap akan Sippul amen u due kamekamelar, me ose isu o por en mas a isu mia, iei Nen en Kot isu me pakadaralan dol en sappa karos. 7A kotido, ap kotiki san puk o ni lim a maun en me kaipokedi pon mol o. 8A ni a kotin aleer puk o, man maur pamen, o lapalap riek pamen poridi on mon Sippul o. Amen amen re irail kolekol a arp o dal kold, me dir en potik en isis, iei kapakap en saraui kan. 9Irail kauleki kaul kap pot indinda: Ir me kotin kon on, kotikida puk o, o lapwada a men katen ko, pwe komui kamatalar o neti ki on Kot nt’ omui san ni kainok karos, o lokaia karos, o men liki karos, o wei karos. 10O kotin wia kin irail la wei eu on atail Kot, pwen samero kan, o re pan nanmarki nin sappa. 11O i kilaner o i roner nil en tounlan toto impan mol o, o man maur ko, o lapalap oko; irail me nederenie nen nen o kid kid, 12Irail indinda ni nil laud: Sippul o me kamekamelar, me kon on aineki manaman, o kapwa, o orpit, o kel, o kaka, o linan, o pai kan. 13Ir karusia nanlan, o sappa, o pan sappa, o pon madau, o aude pan arail karos, i roner me re indinda: Me kotidi pon mol o, o lippul en kapinanla, o kakala, o kalinanada o manaman kokolata. 14Man maur pamen masani: Amen, O lapalap akan poridi on poni i.
Copyright information for
PONPDN